Suðuroyartunnilin fyllir nógv

Herfyri tók okra næmingaráð í hádeildini stig til eina stutta meiningakanning, har spurt varð, um næmingarnir í mið- og hádeildini væntaðu, at teir búgva her í oynni um 20 ár, um ongin Suðuroyartunnil er gjørdur til ta tíð.

47 prosent - nærum helvtin - av næmingunum í 4.-10. fl. eru vís í, at tað gera tey ikki! Harumframt eru tað tey, ið ivast. 

Næmingaráðsformaðurin í hádeildini, Hans Hendrik Strøm, legði hetta úrslitið fram á Borgarafundinum  í Salti herfyri og greiddi annars frá, hvat næmingarnir siga og halda um nú- og framtíðina her í oynni (við og uttan Suðuroyartunnilin). Tey flestu merkja tað í heilum. Galaxy, avlýsingar hjá Smyrli, óveður, eyka útreiðslur í samb. við námsferðir og aðrar ferðir og túrar, landsliðsvenjingar, ið onnur brúka 1-2 tímar uppá, mugu summi herfrá brúka heilar dagar (og møguliga nátt við) uppá ... dømini eru nógv. Nógv tey flestu vilja hava ein Suðuroyartunnil!

Spennandi verður, tá atkvøðast skal! Uttan mun til, hvat úrslitið verður, so verður tað nokk størsta samrøðuevnið í skúlanum (og allari oynni) í morgin!

(Myndin er frá in.fo - Dagfinn Olsen; tað er Hans Hendrik, næmingaráðsformaður í hádeildini, til vinstru á myndini)